عجائب في مصر
العجيبة الاولي
" امشي عالرصيف يا متخلف"
يمشي المواطن المصري في امان الله دائما بجوار الرصيف - من تحت يعني -و انا مش فاهم يعني ايه في اللغة العربية جملة انت ماشي تحت الرصيف؟؟؟؟ كأن مثلا الرصيف ده مساحة يحتوي اسفله علي مساحة اخري يستطيع الانسان العادي المشي فيها
ما علينا
اثناء مشيه " تحت الرصيف " يطلع عليه واحد سواق عربية يقوله ما تمشي عالرصيف يا متخلف
ينظر هذا المواطن المهموم في حيرة للرصيف
فيجده
النوع الاول
اما رصيف رفيع يعني مش عريض اوي و بعد كل 3 متر عمود نور ربنا صاينه و حارسه فيضطر يمشي حبة و ينزل حبة و يطلع تاني و ينزل تفاديا للعواميد المبجلة
و هذا يشبهني باختبار السواقة اللي في مصر حرف الاس العجيب اللي لا يعبر من قريب او بعيد عن ممارسة المختبر للسواقة
المهم
هذا النوع الاول من الارصف المصرية الرفيع ابو عواميد نور ربما تجد عليه ايضا ما يسمي بافرع الشجر او افرع الصبار الصغيرة و التي تخرج من فيلا محترمة صاحبها المسكين لا يقدر علي اصطحاب جنايجني يساوي ما بين الافرع او افرع البلدية زرعاها في اسمنت الرصيف و هنا نقول ان الشعب المصري اخترع تربة للزرع خرسانة مسلحة فيضطر المواطن الغلبان المسكين انه ينزل و يطلع و كان الله في عونه من النزول و الطلوع اذا كان رصيف من الارصفة العالية التي اصبحت سمة كل الارصفة و كأن المواطن مجبور علي عمل تمارين لعضلات الفخذ و الركبة كل مرة
و هذا يعني ان المواطن كبير السن مش حيمشي علي الرصيف اساسا لانه مش حيقدر يطلعه و اللي في عقله مخ مش حيمشي برضه عليها لانه مش كل شوية ينزل و يطلع
و يا سلام لو الرصيف لازق فيه عربيات راكنه يبقي هدومك حتتبهدل وساخة و مش حتعرف تنزل و تطلع
 |
| مثال بسيط |
النوع التاني
و هو بصراحة دليل قاطع و ساطع علي ذكاء المصري العبقري
هو الرصيف العريض
يا سلام رصيف عريض حنظبط بقة يا معلم و حتمشي عليه براحتك لا ازاي
هو انت اساسا بني ادم زي باقي البني ادمين اللي في دول العالم الطبعيين
يروح رازع فيه نخلة و لا ايه يعمل برواز حوالين النخله ياخد تلت اربع الرصيف و هنا لازم تمارس رياضه الوثب فوق الحواجز او يا سلام زي في فيكتوريا كده جنب مدرسة فيكتوريا كوليج يحطلك زرع الصبار-شجرة كده فيها شوك بسيط و فروعها متوزعه زي الدايرة
و المصيبة الحاجات ديه مزروعه في اسمنت يعني حتنموا يعني حتنموا ربنا قادر علي كل شئ
لا لا و تلاقي اعلانات و عواميد نور نظيفة و مفيهاش سلوك عريانة احنا ناس محتشمة سلوك عريانة ايه يا عم احنا بتوع الكلام الفاضي ده حنسيب العيش المدعم ابو تراب و نمسح الاعلانات و العواميد من التراب غير ان الرصيف مزروع في شجر بينقط مية سودا لما الدنيا تمطر و تشوف قميصك مبقع نقط سودا من النقط "المش نضيفة" ديه و ربما تجد عواميد النور مش منورة و تبقي محطوطة عشان يجي العيد يقولك فلان الفلاني عضو الهيئة الفلانية يهنئ اهل الدائرة او المربعه او المثلثة الكرام بحلول العيد المبارك
و يبقي كده النوعين مينفعش تمشي عليهم و اهو اسمه رصيف
معمول وسيلة ترفيه او زينه للمواطن
هو انتوا حتنهبوا رصيف ايه اللي عاوزين تمشوا عليه
الشئ اللي بيجمع بين الرصيفين غير انه مينفعش يتمشي عليه او انه عالي اوي
انه مكان للبيع عندك قهوة حط عالرصيف
طب عندك كراسي بلاستيك حط عالرصيف
و النبي عندك شيبسي و حلويات ارزع عالرصيف
طب عندك فاكهة حط عالرصيف
عند تلاجة حاجة ساقعه حط عالرصيف
غير كده في اماكن اساسا معمول فيها رصيف و الله عرضه ميسمحش تمشي عليه برجل واحدة رفيع مية مية
و ده بقي معمول ليه؟
معمول للاستهلاك
لازم تستهلك المساحة عشان الاسفلت متخلصهوش بسرعه
شاخدلي بالك انت
يعني مفيش حد حياخد عمولة عشان البلاط و الحاجات ديه فاهم انت طبعا يا مواطن
تعالي بقي لجزء ملهوش علاقة باي تلاتين مسئول عنوانه عاوز تستحمي ؟
امشي عالرصيف
ازاي؟
المواطنين الكرام اللي عندهم مكيفات و بدوس علي مكيفات ديه اوي ربنا كرمهم و قدرهم يجيبوا تكييف ربنا يسهله يا عم انا مش بقر عليه بس معهوش يجيب خرطوم يلم فيه مية المكيف
لازم يسبها علي اللي مشيين في الشارع يستحموا هو ده ابو الكرم غرق الناس و حميهم يا عم الجو حر و الجميل اوي لو المكيف مغرق الدنيا قدام باب عمارة مثلا الله يا سيدي حتاخد دش و انت لسه بهدومك نضيف
لا لا لا يا عم شوف بقي و انت ماشي تحت تندة مش نضيفة عليها تراب بالعبيط و نزل عليها مية تكييفو التندة ديه بتسقط عليك مية مع تراب الله الله يا مظبطني انتهي ديه الروح حميني شكرا
و في الاخر يظل المواطن اللي ماشي علي رجله متهان و مداس عليه
اماالمكان الوحيد اللي رصيفه محترم بس برضه بيتخلله عواميد نور هو الكورنيش طبعا عارفين ليه الكورنيش انضف حتة
يبقي طلعنا بحاجات مفيدة جدا اخترعها المسئول المصري
انه يمكن للاشجار و النخيل و الورد ان يمنو نمو كامل في تربة من الخرسانة المسلحة
انه من الممكن ان يتم انشاء رصيف محندق مزنق للزينة العامة بلا فائدة سوي حمل الاعلانات و الزرع و عواميد النور الحاملة للاعلانات
انه من الممكن ان يمشي الانسان الطبيعي تحت الرصيف
انك من الممكن شراء مكيف باخر مليم في جيبك فلا تقدر شراء خرطوم
ان الرصيف لا يمكن لشخص طبيعي يمشي عليه
و تحيا مصر
كتبت في
17-8-2010
